بو وئبلاقدا آنا توركجه‌ميز حاقدا يازماق ايسته‌يه‌نده ائيواز طاهانين بو سؤزو ياديما دوشور "... ديل اؤيره‌نمه‌ميش ديلچی اولور...". جانيم گيزيلده‌يير بو سؤزدن. آمما چوخ دا قورخولو اولماق دوغرو دگيل، اولا بيلمز يعنی. ايكی آی اؤنجه -توركييه‌لی ژورناليستلريندن بیری اولان علی سليم تونجر'ين بير يازی‌سيندان ايده آلاراق-حاضيرلاديغيم يازی‌نی، بوگون تيتره‌يه-تيتره‌يه بورايا قويورام:
"وئبلاق" كلمه‌سی اينگليزجه‌ده‌كی “web” و “log” كلمه‌لرينين بيرلشمه‌سيندن اولوشان زامانلا يايغينلاشميش و قيسالتيلميش آديدير. “web” ين سؤزلوك قارشيليغی "هؤرومجك تورو" آنلامينا گلر. آمما بو "تور"ون آرتيق هؤرومجكلرله ايليشگيسی ضعيفله‌شميش، اونلار اؤز تورلارينا يازيقلار كی، باشقا بير آد تاپماق زورونداديرلار! “log” ايسه كؤتوك آنلامينا گلر. گميلرين سئير دفترينه “log” دئييلير.
قوزئی آزربايجاندا ديل قورومو تاسيس اولسا دا، بللی دئييل نه زامان وئبلاق كلمه‌سی قولاقلارينا ده‌يه، و اونا بير قارشيليق اؤنه‌ره‌بيلسين! بوندان قورخورام وئبلاق قوزئی آزربايجاندا يايغينلاشينجا، بيز او دونيادان هم وئبلاق يازارلارين هم ده ديل قورومونون ايشلرينين نتيجه‌سينه نظاره ائدك! و او زاماناجاق وئبلاقين موددان دوشمه‌سی كسيندير!
هر حالدا بيز "وئبلاق"ا سؤزجوك باخيميندان ايلگی‌له‌نه‌جه‌ييك:
۱. "وئبلاق" آرتيق توركجه‌له‌شميش بير كلمه‌دير.
۲. آزربايجان توركجه‌سينين ان اؤنملی اؤزلليكلريندن، سؤزلرين يازيلديغی كيمی اوخونماسی و اوخوندوغو كيمی يازيلماسيدير. بونون ايستثناسی دا البتته چوخدور. ايكی و ايكی هئجادان چوخ اولوشان سؤزجوكلرين سونو خالق آغزيندا "خ" و غ" اولسا دا اونو "ق" يازاريق. بو يالنيز يازيدا قالير و بيز سؤزجوكلرين سونون "ق" اوخوموروق چوخو زامان. اؤرنه‌يين، "داياق" يازارايق، "داياخ" اوخوياريق. ﴿توركييه و آزربايجان توركجه‌سينده "ق"، "خ"، "ك" و "گ"نين عجايب داستانی وار!﴾.
آيريجا، بو دا وار كی، "وئبلاق" سؤزجويونو "وئبلاگ" يازماق يانليشدير. چونكو توركجه‌ده قالين "گ"ميز يوخدور! يعنی قالين اونلولرين آردينجا "گ" گلمز. ﴿يئنه استثنالار ديشيندا﴾.
۳. وئبلاق كلمه‌سينين دغولماسی‌يلا، طبيعی، يئنی سؤزجوكلرده اولوشدو... اينگليزجه‌ده‌كی، "Bogging" و ""Blogger" بونلارين ان اؤنه‌ملی و ايشلوی چوخ اولاندير.
يازی‌م يئنه چوخ اوزاندی، سس گلرسه آردينی توتاريق!
Sunday, April 29, 2007
Weblog نئجه یازیلار؟!
Tuesday, March 6, 2007
می سورو اکی می؟
چوخداندير بو سورو اكی اولان "می" گيريب منيم بئينيمه و ائله‌بيل چيخماق ايسته‌مير! نئچه جومله بئينيمده دولانير "می"نين چئوره‌سينده! منيم سورولاريمين بيری بو: سورو اكی "می" آيری می يازيلار يوخسا بيتيشيك‌می؟ بونا جاواب وئرمه‌گه بير نوكته‌نی بيلمه‌ميز لازيمدير. آسليندا بو سورويا جاواب وئرمك ايسته‌رسك، اؤنجه بير آيری سورويا جاواب وئرمه‌لی‌ييك! "می" اك می‌دير؟
بيلينديگی كيمی توركجه‌ده هئچ بير اك كلمه‌دن آيری يازيلماز. بيرداها اكين تعريفينه باخاليم : كلمه‌لرين ياپيسيندا يئر آلان، تك‌باشينا آنلامی اولمايان، گؤره‌وينی و آنلامينی گتيرديگی كؤكه گؤره قازانان بيچيملردير. ذاتن اكين تانيمی "بير شئيين اسكيگی‌نی تاماملاماق اوچون اونا قاتيلان پارچا." شكلينده‌دير. بونا گؤره اك'ين آيری يازيلديغيندان سؤز ائديلمز. می اك دئييل، سورو كلمه‌سی‌دير.
بوندان اؤنجه "می" كلمه‌سينی اك قبول ائتديكلری اوچون اونو بيتيشيك يازارلارميش. آنجاق داها سونرا سورو كلمه‌سی اولدوغو قبول ائديلدی و آيری يازيلماغا باشلاندی.
بس "سورو كلمه‌سی می آيری يازيلار".
نوت: سورو و سورغو كلمه‌لری ايسم اولاراق، سورماق فعليندن آلينميشدير. آمما "-ی" اكی مصدردن آد دوزلدن بير اك اولدوغونا گؤره ﴿+﴾ من "سؤال" كلمه‌سی يئرينه "سورو"نو داها آرتيق بَگَنيرم.
